𝗞𝗛𝗔𝗠𝗘𝗡𝗘𝗜 𝗣𝗔𝗪𝗛𝗜𝗡 ‘𝗕𝗨𝗡𝗞𝗘𝗥’ 𝗔 𝗖𝗛𝗛𝗨𝗔𝗛𝗦𝗔𝗡 𝗧𝗔!

(𝘐𝘳𝘢𝘯 𝘚𝘶𝘱𝘳𝘦𝘮𝘦 𝘓𝘦𝘢𝘥𝘦𝘳 𝘵𝘩𝘢𝘩 𝘬𝘢𝘯 𝘵𝘶𝘮, 𝘬𝘢𝘯 𝘱𝘩𝘢 𝘭𝘰 – 𝘐𝘴𝘳𝘢𝘦𝘭 𝘋𝘦𝘧𝘦𝘯𝘤𝘦 𝘔𝘪𝘯𝘪𝘴𝘵𝘦𝘳)

𝓟𝓱𝓾𝓪𝓱𝓴𝓱𝓪𝔀𝓶𝓽𝓾
~ Zoa Tlau (27.6.2025 tlai dar 4:04)
Buannel Cabin

𝗞𝗵𝗮𝗺𝗲𝗻𝗲𝗶 𝘁𝗵𝗮𝗵 𝗮𝗻 𝗹𝗼 𝘁𝘂𝗺 𝗻𝗮𝘀𝗮:
Israel Defence Minister Israel Katz chuan ni 12 chhunga Israel-Iran indo chhûng khan Iran Supreme Leader Ayatollah Ali Khamenei chu thah an tum nasa hle tih a sawi chhuak ta a. Thah tum viau mahse hun remchâng an hmu hmab ta lo tih a sawi.

Israeli broadcasters lian ber ber; Channel 12, Channel 13, leh state-run Kan TV ten an interview-ah Israel Defence Minister chuan Khamenei hi thah an tum ngei a ni, a ti a, mahse hemi hriaa bunker lama a bihrûk tak hnu hian an hmalâkna chu an chhunzawm duh ta lo, a ti.

Katz chuan Khamenei thah chu a tirah an tum ber pakhat a ni tiin a sawi a, hun remchang chu hmu se an hlah loh tur thu a sawi a. “Thah kan tum a hria a, leihnuai thuk tak bunker-ah a lut a, a reh ta hmaka a commander te pawh a be pawp ta lo a ni,” tiin Israel Defence Minister chuan a sawi. Hetihlai hian Trump chuan Khamenei awmna hi an hria a, mahse thah an duh ve lo a, Iran ram rorêlna thlak an duh lo. US chuan Iran-in nuclear ralthuam an neih loh hi an duh ber a ni.

Israel Defence Minister hian a tawpa tawpah chuan Khamenei thah chu thil ṭul ber leh hlawkna thlentu a ni lo tih an hriat thu a sawi a. Hezbollah leader thah ang maiin tâwpna a awm tak tak dawn lo tih an hre hnuhnawh tih a sawi.

𝗔 𝗯𝗶𝗵𝗿𝘂𝗸𝗻𝗮 𝗮ṭ𝗮𝗻𝗴𝗶𝗻 𝗞𝗵𝗮𝗺𝗲𝗻𝗲𝗶 𝗮 𝗹𝗼 𝗰𝗵𝗵𝘂𝗮𝗸:
Hun rei tak chhung thih a hlauh avanga biru Iran Supreme Leader Ayotallah Ali Khamenei chu a tawmna aṭangin a lo chhuak ve ta a. Thih mai a inrin avangin a hma aṭangin a aiawhtu tur pathum a ruat lawk a, a fapa erawh a tel lo.

Khamenei hian US chu a him chinah bei nghalin Iran nuclear hmun chu an tichhe tak tak lo a, Trump-a’n a sawi uar mai mai niin a rawn chuk ve nghal chat mai. Iran-in indona neih zawh tâkah hnehna a chan thu a sawi a, “Islamic Republic-in hnehna kan chang a, American biangah kan beng hrep,” a ti ve hem hem mai. Israel-in an bomb hmasa a nih vaih chuan an beilet na hle dawn tih a sawi bawk.

Inbeihnaah khan Israel chuan mi 28-in nunna an chân tih an sawi a, Iranian Health Ministry-in Iranian 627 an thih thu an sawi.

𝗢𝗽𝗲𝗿𝗮𝘁𝗶𝗼𝗻 𝗽𝗮𝘄𝗶𝗺𝗮𝘄𝗵 𝗽𝗮𝗵𝗻𝗶𝗵:
Operation ‘Red Wedding’ leh ‘Operation Narnia’ te hi en let thuak ila. Red Wedding hi chu Iran millitary hotu lu thawk leh khata thahna tura ruahmanna a ni a. Israel intelligence te hian hun rei tak an lo enthla lâwk tawh a ni. Operation Narnia pawh hi Iran nuclear scientist ṭha dahṭhatna tur a ni a, an nuclear program tihtawpna turin an ti.

Kum sawm hnih zet Israel te hian Iran nuclear programme leh infrastructure hi an lo bihthla tawh a, 1990s chho aṭang khan an bei ngawrh ngat ngat tawh.

𝐏𝐀𝐖𝐈𝐌𝐀𝐖𝐇:
Iran, Persia, chanchin hi a theih chin chin source hrang hrang aṭanga lakhawmin ka ziak mêk a, nakinah indo ‘follow-up’ a zawh thawkhat hunah tihchhuah tum a ni ang. Hei mai bakah hian a tira Israel leh Iran in ṭhianṭhatna te, a hnua Islamic Revolution avanga Iran kal danglam dan ngaihnawm tak tak te leh US ‘Operation Midnight Hammer’ chhuizauna te ziah tum a ni e.

(𝙺𝚑𝚊𝚠𝚝𝚑𝚕𝚊𝚗𝚐, 𝙸𝚗𝚍𝚒𝚊 𝚕𝚎𝚑 𝙼𝚒𝚍𝚍𝚕𝚎-𝚎𝚊𝚜𝚝 𝚜𝚘𝚞𝚛𝚌𝚎 𝚕𝚊𝚔 𝚔𝚑𝚊𝚠𝚖 𝚊 𝚗𝚒)