ISRAEL-IRAN INDO A TAWP TA! Ram 3-in hnehna changah an inngai

’12-𝗗𝗔𝗬 𝗪𝗔𝗥’ 𝗔 𝗧𝗔𝗪𝗣; 𝗨𝗦, 𝗜𝗦𝗥𝗔𝗘𝗟 & 𝗜𝗥𝗔𝗡 𝗧𝗘𝗡 𝗛𝗡𝗘𝗛𝗡𝗔 𝗖𝗛𝗔𝗡𝗚𝗔𝗛 𝗔𝗡 𝗜𝗡𝗖𝗛𝗛𝗔𝗟 Ṭ𝗛𝗘𝗨𝗛

𝓟𝓱𝓾𝓪𝓱𝓴𝓱𝓪𝔀𝓶𝓽𝓾
~ Zoa Tlau (25.6.2025 zing dar 7:52)
Buannel Cabin

Israel leh Iran chuan ni 12 chhung chhum lo chat lova an indo hnuin ‘ceasefire’ an nei ta nge nge. US, Israel leh Iran hian hnehna changah an inngai vek a, Iran-ah hian mipui tam tak chu khawlaiah chhuakin hnehna kawng an zawh. An in leh bungraw chhe nasa tak chu din thar leh turin hma an lâk nghal tur thu thuneituten an sawi. – The Hindu Bureau

𝗜𝘀𝗿𝗮𝗲𝗹-𝗜𝗿𝗮𝗻 𝗶𝗻𝗱𝗼 𝗮 𝘁𝗮𝘄𝗽 𝗳𝗲𝗹:
Darkar 12 liam ta kha a ngaihnawm hle a, ram pahnih ‘Ni 12 chhung indona’ chu a tawp fel ta a. ’12-Day War’ tia Trump-a’n a sawiah hian US, Israel leh Iran hian hnehna changah an inngai ṭheuh a ni.

US chuan Tehran nuclear siamna tur a chhu chhe veka ti ṭha a in ti hle a, Israel-in Iran a sawp viauah inngaiin a inchhuang hle laiin, Iran chuan tlawm hauh lova khawvel ram ropui a hmachhawn tluan chu hnehnaah a ngai. Eng nge an sawi i en zui teh ang.

𝗨.𝗦. 𝘁𝗵𝘂 𝗹𝗲𝗵 𝗵𝗹𝗮:
Trump-a chuan a tirah Israel-Iran buaina hi inbiaknaa chinfel a tum nasa hle a, mahse tharum ngaia a hriat tak avangin a B-2 spirit bomber hmangin Iran nuclear hmun a bei ta a ni. Iran a beih hnu hian Trump chuan vau zui nghalin beihletna a tawh vaih chuan Iran chu a sawp chhe zui nasa dawn hle a, Middle-East-a ramdang te tiduhdahtu chhut chimih chu thil awlsam tak a ni dawn a ti a, ‘remna’ kawng zawh turin a ti.

US President hian Iran nuclear hmun pathum te hi a nuai chimit vek tih a puang a, hetih lai hian tharum hmanga inbeih chhunzawm zel chu Trump hian a nghawng tur ngaihtuahin a duh ta lo a. Iran-in Qatar-a Al Udeid US air base a beih hnu lawkah US-in Iran a bei chhunzawm dawn lo tiin, Trump chuan Iran-in ‘warning’ a pe thlap tih a sawi a, US mi leh sa thi an awm lo.

Trump chuan Iran hian mawi hnai taka indo hi tawpsan a duh niin a hria a, tualchhung mipuiin an rorêltu an dem lohna turin indo tihtawp dan a zawn sak ta a. Iran-in US base a beih dawna a hriattir hmasa te chu a fak a, inbeihna tihtawpna turin hma a la ta zawk a, tlawm chhe lutuka tumah an awm lohna zawngin a hlawhtling ta a ni.

𝗜𝘀𝗿𝗮𝗲𝗹 𝘁𝗵𝘂 𝗹𝗲𝗵 𝗵𝗹𝗮:
Israel hian he indo aṭang hian Iran laka van boruak indonaa an chungnunna an lantir chiang hle a. Islamic Revolutionary Guard Corps an sawp a, an hotu lawk Brigadier General Ali Shadmani an that a, an intelligence hotu lu Brigadier General Mohammad Kazemi leh Brigadier General Hassan Mohaqe an tihlum bawk. Sipai lal leh nuclear scientist 14 bawr an tihlum a. Iran nuclear hmun te, millitary hmun pawimawh leh an air defense an tichhe nasa hle.

Israel hian US-in ‘Operation Midnight Hammer’ hmanga Iran nuclear buatsaihna hmun pathum a beih tak avang khan chan ṭha a chang zui a. Tel Aviv chuan khawvel ram chak leh ropui ber thlawpna nasa tak a dawng tih a chiang a, US-in a thlahthlam lohna finfiahna dik tak a ni. Hetih lai hian Prime Minister Benjamin Netanyahu chuan Israel mipui lakah hlawkna a têl phah a, nakkuma inthlang tur an nih avangin a tlin leh ngei beiseina a sâng viau.

𝗜𝗿𝗮𝗻 𝗺𝗮𝘄𝗶 𝗵𝗻𝗮𝗶 𝘁𝗮𝗸𝗶𝗻:
Iran hian indona tawpsan tawh turin mawi hnai taka ruahmanna siam a mamawh a. US berin a beih tawh avangin tlawm lutuk anga lang si lova tawp a duh tawh a ni. A lei hnuai tawm pûk aṭangin Supreme Leader Khamenei chuan US beihna chhànlet dan tur a ruahman a, US mi leh sa thihna thlen lovin Al Udeid Air Base, Qatar hi a bomb ve ta a ni.

Iran hian an beih tur pawh hi an thlang thiam hle a, Qatar hi an ṭhian ṭha a ni a, Qatar hian he inbeihna hi a dem rualin a chhânglet dawn lo tih a puang a, ‘inkahhai’ nei turin ram pahnih a ngen a nih kha. Middle-east thlang lama US base lian ber a beih hma hian Iran hian Qatar leh US hi a hriattir hmasa vek a, Qatar pawhin airspace kharin US hian an mi leh sa a thiarchhuak vek a ni. Hei vang hian Trump pawhin Iran chu a fak let ta hlauh a, Iran a beih tawh loh tur thu a sawi mai bakah Israel pawh tawp turin a ti zui a.

Iran hian khawvel ram ropui ber lakah kan tlawm lo tiin hnehna changah an inchhal ve thei ta a, a ram mipui te lakah Khamenei hming a ṭha ve ta tho a ni.

Operation Rising Lion, Operation Midnight Hammer leh Operation tho Annunciation of Victory chu mawi hnai takin a tawp ta rih a, eng nge thleng zel ang hriat a ni rih lo.

𝗛𝗿𝗶𝗮𝘁 𝗿𝗲𝗻𝗴 𝘁𝗹𝗮̂𝗸 𝗵𝗻𝗲𝗵𝗻𝗮 𝗸𝗮𝗻 𝗰𝗵𝗮𝗻𝗴 – 𝗜𝘀𝗿𝗮𝗲𝗹 𝗣𝗠:
Israel Prime Minister Benjamin Netanyahu chuan vawiin 25.6.2025 hian Iran nena ni 12 chhung an indonaah ‘hriat reng tlâk’ hnehna an chang tih a sawi a. Chhuan lo la awm zêl tur te thlenga hriat tur a ni tiin, Iran thawhpui Hamas te hnehin leh Gaza-a an mi man te hruai haw an tum a ti.

PM office aṭangin Netanyahu chuan Israel-in White House-ah U.S. President zingah Donald Trump aia ṭhian ṭha kan neih a la awm lo, a ti hial. – Reuters

‘𝗖𝗲𝗮𝘀𝗲𝗳𝗶𝗿𝗲’ 𝗵𝗻𝘂𝗶𝗻 𝗜𝘀𝗿𝗮𝗲𝗹 𝗣𝗠-𝗶𝗻 𝗜𝗿𝗮𝗻 𝗮 𝘃𝗮𝘂:
Ni 12 an indo hnuah Israel PM Netanyahu chuan ‘nation address’ nei nghalin, Iran-in nuclear programme din thar leh a tum a nih chuan an nuai chimit ang tih a tiam a ni.

‘Ceasefire’ avanga ram pahnih te inbeihna a tawp rih tak hnu hian Netanyahu chuan, “Iran hian nuclear ralthuam a nei ngai lo ang,” a ti a. “Iran nuclear project kan tichhe ta vek a, tu pawhin Iran-in nuclear ralthuam nei tura hma a lâk leh phawt chuan kan chét dan tur chu a ngai reng a ni,” tiin a vau nghal. – AFP

𝗨𝗦-𝗶𝗻 𝗜𝗿𝗮𝗻 𝗮 𝗯𝗲𝗶 𝗰𝗵𝗵𝘂𝗻𝘇𝗮𝘄𝗺 𝗱𝗮𝘄𝗻 𝗹𝗼:
Donald Trump chuan Netanyahu hnenah US-in tharum hmangin Iran a bei chhunzawm tawh dawn lo tih a hrilh. Pathianni kal taa Iran nuclear hmun pawimawh pathum a tihchhiat avang khan US chuan Iran chu hlauhawm a ni tawh rih lovah an ngai a. Trump pawhin Iran nuclear site chu hnehsawn takin an tichhia tih a lo puang tawh bawk.

Israel PM hian Trump nena inbiain, Trump pawhin Israel-in Iran a bei chu lawmawm a tih thu a hrilh niin a sawi a. US zarah Iran nuclear siamna tihchhiat vek a nih thu a sawi. – AP & Al Jazeera

(𝙸𝚗𝚍𝚒𝚊, 𝙰𝚕 𝙹𝚊𝚣𝚎𝚎𝚛𝚊 𝚕𝚎𝚑 𝚔𝚑𝚊𝚠𝚝𝚑𝚕𝚊𝚗𝚐 𝚖𝚎𝚍𝚒𝚊 𝚛𝚎𝚙𝚘𝚛𝚝 𝚑𝚛𝚊𝚗𝚐 𝚑𝚛𝚊𝚗𝚐 𝚕𝚊𝚔 𝚔𝚑𝚊𝚠𝚖 𝚊 𝚗𝚒)