𝗜𝗥𝗔𝗡 𝗡𝗨𝗖𝗟𝗘𝗔𝗥 𝗦𝗜𝗧𝗘 𝗣𝗔𝗞𝗛𝗔𝗧 𝗔 𝗖𝗛𝗛𝗘 𝗭𝗢 𝗟𝗢 – 𝗨𝗦 𝗖𝗛𝗜𝗘𝗙 𝗢𝗙 𝗦𝗧𝗔𝗙𝗙

(𝘛𝘳𝘶𝘮𝘱-𝘢’𝘯 𝘒𝘩𝘢𝘮𝘦𝘯𝘦𝘪 𝘻𝘢𝘩𝘥𝘦𝘳 𝘷𝘦 𝘴𝘦 𝘢𝘯 𝘵𝘪, 𝘢 𝘵𝘩𝘶𝘯𝘦𝘪𝘩𝘯𝘢 𝘚𝘦𝘯𝘢𝘵𝘦-𝘢𝘩 𝘢𝘯 𝘩𝘶𝘮)

𝓟𝓱𝓾𝓪𝓱𝓴𝓱𝓪𝔀𝓶𝓽𝓾
~ Zoa Tlau (28.6.2025 zing dar 8:21)
Buannel Cabin

𝗜𝗿𝗮𝗻 𝗻𝘂𝗰𝗹𝗲𝗮𝗿 𝗵𝗺𝘂𝗻 𝗽𝗮𝗸𝗵𝗮𝘁 𝗮 𝗰𝗵𝗵𝗲 𝘇𝗼 𝗹𝗼:
Air Force Joint Chiefs of Staff Chairman Gen. Dan Caine chuan Capitol Hill-a US Senate hmaa ‘briefing’ a neihah US chuan Fordow leh Natanz te bunker-buster Massive Ordnance Penetrator bomb hmangin tichhe vek mah se, Isfahan an tichhe zo lo tih a sawi mauh mai.

US khan Iran nuclear site pathum; Fordow, Natanz leh Isfahan a bei kha a ni a. Isfahan-ah hian Iran hian nuclear bomb siamna tur uranium thlitfim 60% lâi a dah niin hriat a ni ta leh zêl a, Isfahan hi US hian bunker-buster hmangin a bei lo, an ti. Submarine aṭanga tomahawk hmangin Isfahan hi kah chhiat a ni a, a chhungril an khawih lo tih a ni leh ta tlat mai. Beih an tawh hma hian uranium thlitfim hi thuhrûk a nih an ring bawk. I lo thlir zel ang.

𝗥𝗮𝗱𝗶𝗼𝗮𝗰𝘁𝗶𝘃𝗲 𝗽𝘂̂𝘁 𝗵𝗹𝗮𝘂𝗵𝗮𝘄𝗺 𝗮 𝗮𝘄𝗺 𝗹𝗼-𝗜𝗔𝗘𝗔:
International Atomic Energy Agency (IAEA) chuan Iran nuclear hmun beihna avangin mipui tana hlauhawm khawp radioactive pût a awm lo an ti a. US leh Israel ten Iran nuclear hmun an beihna hmunah te ‘data’ an la khawma an zirchian hnuah; hlauh tur a awm loh thu an puang a ni.

𝗦𝗲𝗻𝗮𝘁𝗲-𝗶𝗻 𝗧𝗿𝘂𝗺𝗽 𝗮𝗻 𝗿𝗶𝗻𝗴 𝘁𝗮𝘄𝗸:
Nimin khan US senate chuan Iran War Resolution an ngaihtuah a, Senate Republican chuan President Donald Trump-a’n Iran bei tura hmanrua leh force hmang turin Congress phalna lâk hmasak a mamawh tihna resolution chu an hnawl a. Trump-a thuneihna sawrzìm tumna hi vote 53-47 in hnawl a ni a, an ring tawk a ni.

He resolution hi Sen. Tim Kaine, Virginia Democrat-in War Powers Act of 1973 behchhana a putluh a ni a, Trump-a thuneihna sawrzìm tumna resolution hi ngaihtuah zui ngai lovin vote hmanga hnawl a ni.

𝗙𝗼𝗿𝗱𝗼𝘄 𝗵𝗺𝘂𝗻 𝘀𝗮𝘁𝗲𝗹𝗹𝗶𝘁𝗲 𝘁𝗵𝗹𝗮𝗹𝗮𝗸 𝘁𝗵𝘂𝘁𝗵𝗮𝗿:
Satellite thlalak aṭanga a lan danin Iran nuclear thlitfimna hmun leihnuai thûk taka an siamna hmunpui ber Fordow-ah mihring che vel hmuh a ni a, hnathawk an ang hle. US chuan he hmun hi rinhlelhnaa khatin bunker-buster hmangin an bomb chiam tawh a, Iran erawhin an nuclear ‘enrichment’ hmun hlu ber hi tungding leh turin hma an la leh mêk a ni thei ta tlat mai. Enthlatuten an enthla reng chung hian dahṭawl an tum lo niin a lang, thlalatu hi Maxar Technologies a ni.

𝗧𝗿𝘂𝗺𝗽-𝗮’𝗻 𝗞𝗵𝗮𝗺𝗲𝗻𝗲𝗶 𝘇𝗮𝗵𝗱𝗲𝗿 𝘃𝗲 𝘀𝗲 – 𝗜𝗿𝗮𝗻 𝗙𝗠 𝗔𝗯𝗯𝗮𝘀:
Iranian Foreign Minister Abbas Araghchi chuan X-ah nuclear deal chungchang a post a, US President-in Iran nena nuclear inbiakna neih a duh tak tak a nih chuan Supreme Leader Ayatollah Ali Khamenei hi zahder ve tal se, a ti. Abbas chuan Trump-a’n ṭawngkam chhe pui pui leh zahderna tel hauh lova Khamenei chungchang a sawi ṭhin chu amah leh a zuitu maktaduai tel rilru tinatu a nih thu a tarlang.

𝗜𝗿𝗮𝗻 𝗻𝘂𝗰𝗹𝗲𝗮𝗿 𝘀𝗰𝗶𝗲𝗻𝘁𝗶𝘀𝘁 𝘁𝗵𝗶 𝗹𝗲𝗵:
Inkahhài dawna an inbeihna hnuhnung berah khan Iran chuan a nuclear scientist a chán leh niin report a ni a. Soleiman Soleimani, Iran University of Science and Technology, chu Iranian semi-official Tasnim News Agency chuan a thi tih an puang.

Council on Foreign Relations chuan ni 12 inbeih chhungin Iran nuclear scientist 10 chuang Israel-in an that a, Iran Atomic Energy Organization head hlui Fereydoon Abbasi leh deputy head hlui Amir Hossein Feqhi te pawh an thi tel, tih an puang a. Iran-in an puan danin Mohammad Reza Seddighi Saber, Iran nuclear weapons program buaipuitu langsar tak pawh a thi a ni.

(𝙺𝚑𝚊𝚠𝚝𝚑𝚕𝚊𝚗𝚐 𝚖𝚎𝚍𝚒𝚊 𝙲𝙽𝙽, 𝙰𝙱𝙲 𝚎𝚝𝚌. 𝚕𝚎𝚑 𝙼𝚒𝚍𝚍𝚕𝚎-𝚎𝚊𝚜𝚝 𝚜𝚘𝚞𝚛𝚌𝚎 𝚕𝚊𝚔 𝚔𝚑𝚊𝚠𝚖 𝚊 𝚗𝚒 𝚎)