𝗜𝗥𝗔𝗡-𝗜𝗡 𝗦𝗣𝗬 𝗧𝗜𝗛𝗛𝗟𝗨𝗠 & 𝗠𝗔𝗡 𝗛𝗡𝗔 𝗔𝗡 𝗞𝗔𝗟𝗣𝗨𝗜 MEK…

(𝘐𝘴𝘳𝘢𝘦𝘭 𝘵𝘢𝘯𝘢 𝘦𝘯𝘵𝘩𝘭𝘢𝘵𝘶 6 𝘢𝘯 𝘵𝘪𝘩𝘭𝘶𝘮, 700 𝘤𝘩𝘶𝘢𝘯𝘨 𝘢𝘯 𝘮𝘢𝘯. 𝘑𝘰𝘶𝘳𝘯𝘢𝘭𝘪𝘴𝘵 𝘢𝘯 𝘷𝘢𝘶 𝘣𝘢𝘬𝘢𝘩 𝘢𝘯𝘮𝘢𝘩𝘯𝘪 𝘮𝘪𝘱𝘶𝘪𝘢𝘩 𝘢𝘯 𝘵𝘶𝘢𝘯)

𝒫𝒽𝓊𝒶𝒽𝓀𝒽𝒶𝓌𝓂𝓉𝓊
~ Zoa Tlau (27.6.2025 zing dar 7:15)
Buannel Cabin

Indo a tawp thawkhat a, ’12-Day War’ zawh aṭanga ni khatah Iran thuneitute chuan Israel Intelligence Agencies tana thawk nia rinhlelh an man ṭan a, mi pathum lâi spy nia an hriat an khaihlum tawh niin report a ni a. Hetihlai hian Middle-east media ṭhenkhat erawhin hei aia tam daih hi an tihlum tawh niin an report thung.

He thil thleng mak danglam leh la awm ngai lo a ni a, Iranian security services hi Israeli agents te hian a rûkin an hre hneh em em kha khawvel mak tih a tling.

𝗜𝗿𝗮𝗻 𝘀𝗰𝗶𝗲𝗻𝘁𝗶𝘀𝘁 & 𝘀𝗶𝗽𝗮𝗶 𝗹𝗮𝗹 𝘁𝗲 𝘁𝗵𝗶𝗵𝗻𝗮 𝘁𝗵𝗹𝗲𝗻 𝗰𝗵𝗵𝗮𝗻𝗮 𝗽𝘂𝗵 𝘀𝗽𝘆 𝘁𝗲:
Iran thueitute chuan an rama mi pawimawh lutuk; nuclear an neihna tura thawktu scientist te leh senior commander ṭhahnem tak, Islamic Revolutionary Guard Corps (IRGC) innghahna thah an nih theihna chhan chu entglatu Israel tana thawk spy ten Israel hnena thurûk an rawlrûk vang niin an ngai. Israel intelligence agency Mossad te chu Iran tualzawlah a rûkin thûk takah hna an thawk nasa hlê niin thuneitute chuan an ngai a ni.

Ṭhenkhat erawhin Iran thuneitute chêt duh dan chu indo tuartu mipui lungawi lo te vaubehna leh mipui chunga thuneihna khauh zawk lekna hmanrua mai niin an ngai.

𝗦𝗽𝘆 𝘁𝗶𝗵𝗵𝗹𝘂𝗺 𝗹𝗲𝗵 𝗺𝗮𝗻 𝗯𝗲𝗹𝗵 𝘇𝗲̂𝗹𝗻𝗮:
Ni 12 chhung Israel leh Iran an inbeih chhung khan Iran ram chhunga Israel intelligence agencies nia an hriat mi 3 chu Iran thuneitute hian an tihlum a. Indo a zo a, inkhhái an neih aṭanga ni khat a liam hnuin Iran thuneitute chuan spy ni ngeia an hriat midang 3 an tihlum leh tawh a ni.

Sorkar thuneitute chuan vawiin thlengin Israel tana Iran enthlâk hna thawktu a za tel an man belh zêl tih an puang ul ul mai a. Hei hian mipui a ti ralṭi hle nghe nghe. State te TV chuan Israel tana enthlatu nia puh, Iran mi leh sa ṭhahnem tak telin, te inpuanna chu an tichhuak nasa hle a. An vieo record-a Israel intelligence te nen thawkho an nih thu an sawina te chu uar taka tihchhuah mêk a ni.

Human rights groups leh activists te chuan Iran sorkar chet dan chuan hlauhthawnna nasa tak a siam niin an sawi a. Iran hian tharum hmanga inpuan luihtir an chìn êm avangin an mi puhte chu enthlatu ni lo mah se, an inpuantir tho tho an hlau hle. Heng te avang hian tihhlum tur hi an la nei nualah an ngai bawk.

𝗜𝗿𝗮𝗻 𝗝𝗼𝘂𝗿𝗻𝗮𝗹𝗶𝘀𝘁 𝘁𝗲 𝗮𝗻 𝗿𝗶̂𝗸𝗿𝗮𝗽, 𝗺𝗶𝗽𝘂𝗶 𝗮𝗻 𝗿𝗮𝗹ṭ𝗶:
Iran thuneitute chuan ni 12 chhung indona kha khawthlang te leh Israel te inthurualna ‘râwng taka indona’ tiin an sawi a. Iran thuneitute chuan khawthlang ram leh Israel intelligence network ṭangrual a do thu an sawi a – CIA, Mossads leh MI6 ten an beihrawn niin a hria.

IRGC nena thawkho Fars News Agency chuan ni 12 indo chhung khan Israel agencies te Iran ram chhungah an che nasa hle tih a report a. Hemi chhung hian Iran intelligence and forces chuan rinhlelh mi 700 chuang an man hman a ti.

Persian ṭawnga Iran pawn aṭanga indo chanchin puangzartu BBC Persian, London-based Iran International leh Manoto TV te chuan vauna nasa tak an tawk a. Indo chhûng khan hlauthawng reng reng news an report a, Iran intelligence leh security force ten an chhung te an mana thahah an vau bawk.

Iran International reporter te chhungkhat ; nu leh pa bakah unau te chu an man sak a. Indo chanchin puang tawh lo tur leh an hna bansan turin an vau nasa hle.

BBC Persian thawktute pawhin Iranian Security official vauna na tak an tawk a, indo lai chuan an chhung te Iran-a awm chu hmelma anga target leh man theih an nih thu te an hrilh chamchî a. Reporter te chu ‘Pathian kalh zawnga dotu’ tiin ‘mohareb’ niah an puh a, thihna hiala hrem theih an ni.

Manoto TV lam pawh an bang bik lo a, an chhung te chu sorkarin an vau nasa hle a. Reporter te pawh ‘Pathian nena inhmêlma zawnga khawsa’ niin an puh a, Israel tâna enthlatu-ah an puh bawk. An puhna hi Iran danah chuan thihna tenga inhrem theih a ni.

𝗠𝗶𝗽𝘂𝗶 𝗰𝗵𝘂𝗻𝗴𝗮 𝗵𝗹𝗲𝗶𝗹𝗲𝗻𝗻𝗮:
Iran ram chhunga ziakmi, activist leh artist tam tak chu chhan mumal tak awm hauh lovin an man ringawt hlawm a. Kum 2022-a “Woman, Life, Freedom” lungawilohna lantirnaa sorkar do zawnga che te pawh tun ṭumah hian an man tel ringawt bawk.

An chêt dan hi mipui vaubehna hmanrua a ni pahin a lang ber a, thuneitute laka lungawi lo te an hel mai loh nan sorkar thuneitute hi râwng tak leh dim nei hauh lovin an che a. Tun ṭum buaina kaihhnawih ni miah lo thleng tengin mipui hi an rîkrâp tel a ni.

Mipui te lungawi loa sorkar dinglai paih tuma rampuma buaina lian zawk a chhuah mai loh nan thuneitute chuan indo ṭan tirh khan internet an titawp vek a. Inkahhài hnuah pawh internet hi an la titawp zui ta zel a. Social network ṭhenkhat; Instagram, Telegram, X leh YouTube, news websites BBC Persian te chu Iran sorkar hian a tihtawpna a rei tawh a, Iran aṭanga an lut duh a nih pawhin Virtual Private Network (VPN) proxy service kaltlang a ngai.

𝗜𝗿𝗮𝗻 𝗰𝗵𝗮𝘂𝗵𝘁𝗵𝘂𝗯𝗮𝗿𝗮𝘄𝗵 𝗮𝗻 𝗵𝗹𝗮𝘂:
Human rights advocate leh political observer te chuan kum 1980 chhoa thil lo thleng tawh ang kha a thlen an hlau hle mai a. Iran-Iraq War neih ṭum khan Iran sorkar chu tualchhung politics-a an ep te chungah a ṭuan vak mai a nih kha.

Israel nena an inbeih hnu hian Iran chu khawvel mithmuhah a tlahniam hle a, hei vang hian Iran thuneitute chu anmahni tualchhungah ṭuanin mipui tihhlum, a rem rem man khawm leh inawpbehna rip zawkah a ṭuan mai an hlau a ni.

Kum 1988 indo ṭum pawh khan human rights advocate leh political observer te sawi dan chuan Iran hi anmahni mi leh sa rinhlelh leh tihhlumah a ṭuan an ti a. ‘Death commissions’ dinin, politics vanga an mi man sang tel tehmeuh an tihlum a. An tihhlum te hi hmuhchhuah mai harsa turah chhinchhiahna awm lovin an phum a ni.

(𝙺𝚑𝚊𝚠𝚝𝚑𝚕𝚊𝚗𝚐 𝚖𝚎𝚍𝚒𝚊 𝚑𝚛𝚊𝚗𝚐 𝚑𝚛𝚊𝚗𝚐 𝚕𝚎𝚑 𝚖𝚒𝚍𝚍𝚕𝚎-𝚎𝚊𝚜𝚝 𝚛𝚎𝚙𝚘𝚛𝚝 𝚕𝚊𝚔 𝚔𝚑𝚊𝚠𝚖 𝚊 𝚗𝚒 𝚎)